Халлаан хас да күн сабардаан турбут хараҥа былыттарын халбарытан, аламай маҥан күнүн сайыҥҥылыы сандаарыччы күлүмнэтэ көрдөрөн, бэл айылҕалыын, тулалыыр эйгэлиин бу ураты тыыннаах-салгыннаах тэрээһини айхаллаата.

Бу күн торумнаммытын курдук алгыстаах аартыктар айар дьону Халамнаайыга сирдээтилэр.

Улуу убайбыт Былатыан Ойуунускай төрөөбүтэ 125 сылын көрсө Таатта "таҥаралаах" бэйиэт, доҕуһуолдьут, Олоҥхо тыйаатырын бас-көс киһитэ Битээлий Былааһап "Ойуунускайга сүгүрүйүү" диэн хоһоон уонна ырыа, кырыымпа уонна хомус, олоҥхо уонна тойук дьүөрэлэспит, ситимнэммит-силбэспит дьүрүскэн эйгэтин тэрийдэ.

Оҕо Былатыан үрүҥ тыынын өллөйдөөбүт, харыһыҋбыт-таптаабыт, үтэлээн күлүм аллаппыт Халамнаайы кытылыгар Ойуунускай "Оҕо куйуурдуу турара", "Кээрэкээн Ойуун", "Соломуон Муударай", "Дойду оҕото Дорогуунап Ньукулай", "Өрүөл кэриэһэ", "Сүүс сыллаах улуу былаан", "Таатта үрэх үрдүгэр" айымньылара Битээлий Былааһап уонна "Кыл Саха" бөлөх толорууларыгар бар дьон сэҥээриитигэр таҕыстылар. Улуу убайбыт тыыннаах айымньылара - "кэхтибэт кэрэкэ тыллара" хоһоон-кэпсээн-ырыа-кылыһах--ойуу тыл- буолан, куйаарга көтөн, көрөөччү -иитээччи этин сааһын ортотунан киирэн, араас иэйиини үөскэттилэр.

Битээлий Былааһап "Ойуунускай, бырастыы" диэн хоһооно киһи кутун кылын таарыйда. Ойуунускай бу олохтон хомойон хоргутан, хараастан арахсыбытын, көмүс уҥуоҕа көтөҕүллүбэккэ, сииккэ-силбиккэ симэлийбитин, сырдык аата ааттаммакка тэпсиллэ сылдьыбытын иһин, бу да күҥҥэ кини дьылҕатын хоруотуур, айбыт-туппут үлэтин намтата сатыыр дьон баалларын барытын бар дьонун аатыттан бырастыы гыннарар, көрдөһөр ис хоһоонноох киһи уйадыйбакка истибэт ырыа-хоһоону бары да аймана иһиттибит.

Дархан этээччи Сахаайта Мойтохонова уонна Алексей Николаев олоҥхоттон толорон, тыл күүһэ, сүдүтэ, кэрэтэ уонна айылҕа маанылаан хатаҕалаабыт куолаһа, кылыһаҕа холбоһон, тохтообокко кутуллан, "хааһахтан хостонон", кулгааҕы-хараҕы сылаанньытар бастыҥ, кэрэхсэл да көстүү үөскээтэ.

Карл Христофоров салайар аҕа саастаахтар хордарын толоруутугар Ойуунускай "Куоттарбыт кутурҕана" хоһоонугар Карл Иванович дорҕоон ууран, айыллыбыт саҥа ырыаны долгуйа иһиттибит. Былатыан Сүөкүччэ доҕорун сүтэрэн, аймаммыт, суламмыт бу санньыар хоһоонун ырыатын, кини курус иэйиитин бэл айылҕа иһийэн иһиллээбиккэ дылы буолла.

Онон бу күн ураты эйгэ, долгун, ситим үөскээтэ. Ойуунускай тыл имэҥнээх, тыл илбистээх, тыл иччилээх айымньылара дьүрүскэн, дьүһүлгэн доҕуһуол, дорҕоон күүһүнэн өссө имэҥирэн-иччилэнэн салгыҥҥа сатарыы дайдылар, көҥүлгэ көччүйэ көттүлэр.

Жанна Бурмистрова

Вернуться назад