01  02
 03  04

Куту-сүрү куоһуур, санааны ыраастыыр үтүө киэһэ буолла. Улуу убайбыт тыла дуорааннанан хас эмэ хос суолталанан, хаттыгастаах санаалар киирэллэр. Махтал! Махталы ыла тур!
Е.П. Чехордуна

Дьэ, доҕоор, Улуу Ойуунускай айымньыларын ырыаҕа-тойукка тиһэн, дьоҥҥо-норуокка билиһиннэрэн үтүөкэннээх да үлэ харгыстарын туорааҥҥын, туохтан да туллубакка, кимтэн да толлубакка "сүүс сыллаах былаан" буолан туругура туруо! Аар саарга аатырыа турдаҕа! УРУЙ ТУСКУО!
Пантелеймон Петров

Айар илбиһиҥ арахсыбатын! Саҥаттан саҥаны саҥара сырыт!

 Бүгүн убайым, Олоҥхо тыйаатырын дириэктэрэ, СӨ искусствотын үтүөлээх деятела, Россия суруйааччыларын сойууһун чилиэнэ, поэт уонна музыкаһыт Битээлий Былааһап үс саха духуобунай лидерэ, автономиятын аҕата, аар айааччы Былатыан Ойуунускай төрөөбүтэ 125 сылыгар анаммыт кини айымньыларынан ырыа-кэпсээн, доҕуһуоллаах хоһоон уонна олоҥхо, тыыннаах ырыа дьоро киэһэтин "Кыл саха" бөлөҕү кытта "Дорҕоон дойду" диэн уораҕайга ыытта.
Саха саарынын сырдык аатыгар сүгүрүйэр сиэр-туом дьүһүлгэнэ киһи этин сааһын устун дьырылыы кыынньан киирэн өйгө-сүрэххэ, сүргэ-кукка дьайар көстүбэт ситими олохтоото. Дьүһүйүү дьиҥ суолтатын, тускулун өйдөөччү чуумпутук иһигэр буһарда, өйдөөбөтөх саҥарбакка аһарда...
Ноо!
Гаврил Андросов-поэт

Халлаан хас да күн сабардаан турбут хараҥа былыттарын халбарытан, аламай маҥан күнүн сайыҥҥылыы сандаарыччы күлүмнэтэ көрдөрөн, бэл айылҕалыын, тулалыыр эйгэлиин бу ураты тыыннаах-салгыннаах тэрээһини айхаллаата.

Бу күн торумнаммытын курдук алгыстаах аартыктар айар дьону Халамнаайыга сирдээтилэр.

Улуу убайбыт Былатыан Ойуунускай төрөөбүтэ 125 сылын көрсө Таатта "таҥаралаах" бэйиэт, доҕуһуолдьут, Олоҥхо тыйаатырын бас-көс киһитэ Битээлий Былааһап "Ойуунускайга сүгүрүйүү" диэн хоһоон уонна ырыа, кырыымпа уонна хомус, олоҥхо уонна тойук дьүөрэлэспит, ситимнэммит-силбэспит дьүрүскэн эйгэтин тэрийдэ.

Оҕо Былатыан үрүҥ тыынын өллөйдөөбүт, харыһыҋбыт-таптаабыт, үтэлээн күлүм аллаппыт Халамнаайы кытылыгар Ойуунускай "Оҕо куйуурдуу турара", "Кээрэкээн Ойуун", "Соломуон Муударай", "Дойду оҕото Дорогуунап Ньукулай", "Өрүөл кэриэһэ", "Сүүс сыллаах улуу былаан", "Таатта үрэх үрдүгэр" айымньылара Битээлий Былааһап уонна "Кыл Саха" бөлөх толорууларыгар бар дьон сэҥээриитигэр таҕыстылар. Улуу убайбыт тыыннаах айымньылара - "кэхтибэт кэрэкэ тыллара" хоһоон-кэпсээн-ырыа-кылыһах--ойуу тыл- буолан, куйаарга көтөн, көрөөччү -иитээччи этин сааһын ортотунан киирэн, араас иэйиини үөскэттилэр.